📕भारतीय नौदलात पायलट म्हणून नियुक्ती होणाऱ्या शुभांगी स्वरूप या पहिल्या महिला अधिकारी बनल्या आहेत. ‘मॅरिटाइम रेकनन्स एअरक्राफ्ट’चे सारथ्य मूळच्या उत्तर प्रदेशच्या असलेल्या शुभांगी करतील. याव्यतिरिक्त पहिल्यांदाच तीन महिला अधिकाऱ्यांची नौदलाची उपशाखा असणाऱ्या ‘नेव्हल आर्मामेंट इन्स्पेक्टरेट’ विभागात नियुक्ती झाली आहे.
📕भारताने या वर्षात कसोटी आणि एकदिवसीय अशा दोन्ही प्रकारांमध्ये आयसीसीच्या क्रमवारीत अव्वल स्थान पटकावले. भारताची एकाच वेळी दोन्ही प्रकारांमध्ये अव्वल स्थान पटकावण्याची ही पहिली वेळ आहे. त्याचबरोबर अंधांसाठी असलेला टी-२० विश्वचषक वर्ल्डकप यंदा भारतीय टीमने जिंकला.
📕भारताच्या किदांबी श्रीकांतने बॅडमिंटनमध्ये एका वर्षात चार सुपर सिरीज जिंकण्याचा पराक्रम करत इतिहास घडवला. श्रीकांत इंडोनेशिया, ऑस्ट्रेलिया, डेन्मार्क आणि फ्रान्स या देशांमध्ये झालेल्या स्पर्धांमध्ये अजिंक्य ठरला.
📕फुटबॉल विश्वकपचे आयोजन क्रिकेटवेड्या भारतात होणे, ही कल्पनाच भन्नाट होती आणि ती कल्पनाही २०१७ने साकार करून दाखवली. यंदा भारतात अंडर-१७ फिफा वर्ल्डकप रंगला आणि देशभरातील तब्बल १३.५ लाख लोकांनी या विश्वचषकाचा आनंद लुटला. हा फुटबॉल विश्वचषक जरी भारताला जिंकता आला नसला तरी, केवळ यजमानपद मिळाल्याने भारतीय तरुणाईचा आनंद गगनात मावेनासा झाला.(@spardhavishwa)
📕ऑगस्ट २०१७मध्ये सर्वोच्च न्यायालयाने भारतातील मुस्लीम महिलांना दिलासा देणारा एक निर्णय दिला. सर्वोच्च न्यायालयाच्या पाच पैकी तीन न्यायमूर्तींनी मुस्लीम समाजात प्रचलित असलेली ट्रीपल तलाकची पद्धत घटनाबाह्य असल्याचा निर्णय दिला. सरकारने ही पद्धत पूर्णपणे बंद करण्याऐवजी कायदा करेपर्यंत सहा महिने त्यावर बंदी घालावी, असे मत इतर दोन न्यायमूर्तींनी दिले. केंद्रीय न्यायमंत्री रवीशंकर प्रसाद यांनी २८ डिसेंबर २०१७ रोजी संसदेत तिहेरी तलाकला गुन्हा ठरवणारे विधेयक मांडले आणि लोकसभेने ते विधेयक पास करत आता राज्यसभेत मांडण्यात येणार आहे.
📕तृतीयपंथीयांचे सक्षमीकरण व्हावे, या दृष्टीने या वर्षात अनेक प्रयत्न झाले. भारतातील पहिल्या ट्रान्सजेंडर न्यायाधीश म्हणून पश्चिम बंगालच्या ज्योइता मोंडल यांची नियुक्ती झाली. ‘तामिळनाडू युनिफॉर्म सर्व्हिसेस रिक्रूटमेंट बोर्ड’च्या निर्णयाला तामिळनाडूच्या प्रीतिका अश्नी यांनी न्यायालयात आव्हान दिले होते. त्या त्यानंतर पहिल्या पोलीस उपनिरीक्षक बनल्या. तसेच भारतात पहिल्यांदाच कोचीच्या मेट्रोमध्ये २३ ट्रान्सजेंडरना एकाच वेळी नोकरी देण्यात आली.
